Category: Events

 

எதிர்வரும் 30.03.2024ம் திகதி சனிக்கிழமை சர்வதேச பூச்சிய கழிவு தினத்தை முன்னிட்டு யாழ் மாநகர ஆணையாளர் அவர்களினால் பல்வேறு வேலைத்திட்டங்கள் முன்னெடுக்கப்படுகின்றது. இதனடிப்படையில் கழிவுகளை தரம் பிரித்து அகற்றுவது  மற்றும் மாநகரத்தை தூய்மையாக பேணுவதன் முக்கியத்துவத்தை பொதுமக்களுக்கு உணர்த்தும் வகையிலும் நாளைய தினம் (30.03.2024 )காலை 7.00 மணிக்கு ஆரியகுளம் சந்தி மற்றும் மடத்தடி சந்தி ஆகிய இடங்களில் இருந்து மாநகர ஆணையாளர் அவர்களின் தலைமையில் ‘ஆரோக்கிய யாழ் பவனியும் தூய்மையாக்கல் பணியும்” எனும் தொனிப்பொருளில் நடைபவனி ஆரம்பித்து பண்ணை சுற்றுவட்டத்தில் முடிவடையும் என அறிவிக்கப்பட்டுள்ளது.

இவ்வேலைத்திட்டத்தின்போது வீதியோரங்களில் உள்ள உக்கும் மற்றும் உக்காத கழிவுகள் அகற்றப்படுவதுடன் மாநகர வரியிறுப்பாளர்கள் தங்களால் அகற்றப்படும் உக்கும் மற்றும் உக்காத கழிவுகளை மாநகரசபையின் கழிவகற்றல் உழவு இயந்திரங்களுக்கு வழங்க முடியும். இவ்வேலைத்திட்டத்தில் யாழ்நகரப்பாடசாலைகளில் சிரமதான நடவடிக்கைகளை மேற்கொண்டு மாணவர்கள் மத்தியில் விழிப்புணர்வை ஏற்படுத்துமாறு அதிபர்களுக்கு அறிவிக்கப்பட்டுள்ளதுடன் பாடசாலைகளினால் சிரமதானம் செய்து அகற்றப்படும் கழிவுகளை உடனடியாக மாநகரசபையின் கழிவகற்றல் வாகனங்கள் மூலம் அகற்ற நடவடிக்கை எடுக்கப்பட்டுள்ளதாக மாநகர ஆணையாளர் அறிவித்துள்ளார்.

இவ்வேலைத்திட்டத்தின் தொடர்ச்சியாக யாழ்ப்பாணம் மாநகரசபையின் இருபத்தேழு வட்டாரங்களை உள்ளடக்கி வெவ்வேறு இடங்களில்  ஏற்கனவே அமைக்கப்பட்ட ஒன்பது கழிவகற்றல் பிரட்டு மையங்களில் எதிர்வரும் வாரங்களில் மாற்றமொன்றை மேற்கொண்டு அனைத்து பிரட்டு மையங்களும் இருபத்து நான்கு மணிநேரமும் இயங்கி பொதுமக்கள் தங்கள் கழிவுகளை தரம் பிரித்து வழங்குவதற்கும் கழிவகற்றல் வாகனங்கள் அனைத்து வட்டாரங்களிலும் நேரசூசி முறைமையில் கழிவகற்றல் செயற்பாடுகளை மேற்கொள்வதற்கும் நடவடிக்கைகள் எடுக்கப்பட்டு வருவதாகவும் விரைவில் அமுல்படுத்தப்பட்டு கழிவகற்றல் செயற்பாடுகள் மேலும் சிறப்பாக  இடம்பெறும் என ஆணையாளர் தெரிவித்துள்ளார்.

யாழ்ப்பாணம் மாநகரசபையின் உத்தியோகபூர்வ இணையத்தளம் 01.03.2024ம் திகதி வெள்ளிக்கிழமை காலை 10.30 மணிக்கு கௌரவ ஆளுநர் பி.எஸ்.எம். சாள்ஸ் அவர்களால் பிரதம செயலாளர் செயலகத்தின் கேட்போர் கூடத்தில் அங்குரார்ப்பணம் செய்து வைக்கப்பட்டது.

மக்கள் பணியில் சிறப்பாக சேவையாற்றும் உள்ளுராட்சி மன்றங்கள் உத்தியோகபூர்வ இணையத்தளமுடாக தகவல் தொழில்நுட்ப உலகத்திற்குள் பிரவேசித்து மக்கள் பணிகளை மேற்கொள்ள முன்னெடுத்துள்ள முயற்சி பாராட்டத்தக்க விடயமாகும் எனக் குறிப்பிட்ட கௌரவ ஆளுநர் அவர்கள் தற்போதைய இளம் சமுதாயத்தினர் அனைத்து விடயங்களையும் தொழில்நுட்பரீதியாக கையாள்வதால் எமது சேவைகளையும் அவர்களுக்கு ஏற்றவகையில் மிக வேகமாக இவ்வாறான இணையத்தளங்களினூடாக வழங்கமுடியும் என தெரிவித்தார்.

பொதுமக்கள் தங்களுக்கான சேவைகளை இணையத்தினூடாக பெற்றுக் கொள்வதற்கு தேவையான வசதிகளையும், வரி உள்ளிட்ட கட்டணங்களையும் இணையத்தளத்தினூடாக செலுத்துவதற்கான வசதிகளையம் மேம்படுத்த வேண்டுமென வடக்கு மாகாண கௌரவ ஆளுநர் அவர்கள் இதன்போது அதிகாரிகளுக்கு தெரிவித்தார்

இந்நிகழ்வில் பிரதம செயலாளர், உள்ளுராட்சி அமைச்சின் செயலாளர், உள்ளுராட்சி ஆணையாளர், இறைவரித்திணைக்களத்தின் மாகாண ஆணையாளர், யாழ் மாநகரசபை ஆணையாளர், உள்ளுராட்சி உதவி ஆணையாளர்கள், ஆசிய மன்றத்தின் பிரதிநிதி, சபையின் செயலாளர்கள், தகவல் தொழில்நுட்ப உத்தியோகத்தர்கள் உள்ளிட்ட பலரும் கலந்து நிகழ்வை சிறப்பித்ததோடு இணையத்தளத்தை வடிவமைத்தவர்களுக்கு பாராட்டு தெரிவித்து பிரதம செயலாளர் அவர்களால் பராட்டுப்பத்திரமும் வழங்கப்பட்டது.

எமது சபையுடன் இணைந்து USAID நிறுவனம் 2021ம் ஆண்டு ஒக்டோபர் மாதம் தொடக்கம் ‘தூய்மையான நகரங்கள் , நீலவர்ணக் கடல் திட்டம் கூட்டிணைவுடன் நடைமுறைப்படுத்தப்படுகின்ற திட்டம்” 2024ம் ஆண்டு பெப்ரவரி மாதம் நிறைவுபெறுவதால் இத்திட்டத்தில் அர்ப்பணிப்புடன் பணியாற்றிய ஆணையாளர் , பிரதம பொறியியலாளர், மாநகர சுகாதார பொறியியற் பிரிவின் பொறுப்பதிகாரி, மேற்பார்வையாளர்கள், திட்டத்துடன் தொடர்புபட்ட மாநகரசபையின் ஏனைய ஆளணியினரையும் கௌரவிக்கும் நிகழ்வினை USAID நிறுவனம் ஏற்பாடு செய்திருந்தமை குறிப்பிடத்தக்கது

 

யாழ்ப்பாண மாநகரசபையின் 17வது ஆணையாளராக திரு.ச.கிருஷ்னேந்திரன் அவர்கள் 09.02.2024ம் திகதி சுபநேரத்தில் பதவியேற்றுக் கொண்டார்.புதிய ஆணையாளரை மாநகரசபையின் பிரதி ஆணையாளர் திரு.வே.ஆயகுலன் அவர்களின் தலைமையில் உத்தியோகத்தர்குழாத்தினர் வரவேற்றனர். இலங்கை நிர்வாக சேவையில் தரம் -I பதவியில் உள்ள திரு.ச.கிருஷ்னேந்திரன் அவர்கள் அனுபவம் வாய்ந்த நிர்வாக அதிகாரி என்பது குறிப்பிடத்தக்கது.

 

 

 

 

பிரித்தானியாவுக்கும் இலங்கைக்கும் இடையிலான 75 வருட இராஜதந்திர உறவுகளை முன்னிட்டு மூன்று நாள் விஜயமாக எமது நாட்டுக்கு வருகை தந்த பிரித்தானியா இளவரசி அவர்கள் யாழ்ப்பாணத்திற்கு விஜயம் செய்து பொதுநூலகத்தை பார்வையிட்டார்.இச்சந்திப்பின்போது ஆணையாளரினால் இளவரசி அவர்களுக்கு நினைவுப்பரிசும் வழங்கப்பட்டது

 

மாநகரசபையின் அலுவலகக்கடமைகளை ஆரம்பிக்கும் நிகழ்வு மாநகர ஆணையாளர் இ.த.ஜெயசீலன் அவர்கள் தலைமையில் 01.01.2024ம் திகதி மாநகரசபையின் வாளகத்தில் காலை 9.00 மணிக்கு இடம்பெற்றது.மாநகரசபையின் அனைத்து உத்தியோகத்தர்களும் கலந்து கடமைச்சபதம் எடுத்துக் கொண்டனர்.

யாழ் மாநகர சபையின் 31வது நல்லைக்குமரன் புத்தக வெளியீடானது 25.08.2023ஆம் திகதியன்று காலை 09.00மணிக்கு நடைபெற்றது.இந்நிகழ்வில் பிரதம விருந்தினராக ஜனாதிபதியின் மேலதிக செயலாளர் திரு.இ.இளங்கோவன் அவர்கள் கலந்து சிறப்பித்தார்.யாழ் மாநகரசபையின் சைவசமய விவகாரக்குழுவினரால் நல்லைக்குமரன் மலரானது இனிதே வெளியிடப்பட்டது.

யாழ் மாநகரசபையின் ஏற்பாட்டில் முத்தமிழ் விழா 29.07.2023 ஆம் திகதி நல்லூர் ஸ்ரீ துர்க்காதேவி மணிமண்டபத்தில் ஆணையாளர் இ.த.ஜெயசீலன் தலைமையில் சிறப்பாக நடைபெற்றது. விழாவில் வடமாகாண ஆளுநர் திருமதி.பி.எஸ்.எம்.சார்ள்ஸ் பிரதம விருந்தினராக கலந்து கொண்டார். இயல், இசை, நாடகத்துறையில் பெரும்பங்காற்றிய கலாபூஷணம் கோகிலா மகேந்திரன், கலாபூஷணம் எம்.பி.பாலகிருஞ்ணன், கலாகீர்த்தி சாந்தினி சிவநேசன் ஆகியோர் யாழ் மாநகரசபையின் உயரிய விருதான அரசகேசரி விருது வழங்கி கௌரவிக்கப்பட்டனர்.

இயல், இசை, நாடக அரங்குகளாக நிகழ்ந்த நிகழ்வுகளில் ஈழநல்லூர் நாதஸ்வர இளவரசன் பிச்சையப்பா ரஜீந்திரன் குழுவினரின் நாதஸ்வரக் கச்சேரியும், இசை நாட்டிய நாடக அரங்கில் ஏழிசை மிருந்தங்க நர்த்தனாலயத்தின் வெந்து தணிந்தது காடு எனும் நாட்டிய நாடகமும், இயல் அரங்கில் எம் மண்ணில் இன்றைய சூழலில் உயர்கல்வியும், மனிதநேயம், கலாசார பண்பாடுகளும் எனும் தலைப்பில் தெல்லிப்பழை ஸ்ரீ துர்க்காதேவி தேவஸ்தானத்தின் தலைவரான செஞ்சொற்செல்வர் கலாநிதி ஆறு.திருமுருகனை நடுவராகக் கொண்ட பட்டிமன்றமும் நடைபெற்றது.